Um Betri Reykjavík


Betri Reykjavík er samráðsvettvangur á netinu þar sem íbúum borgarinnar gefst tækifæri til að setja fram hugmyndir sínar um málefni er varða þjónustu og rekstur Reykjavíkurborgar. Vettvangurinn er opinn öllum til skoðunar og til þátttöku gegn skráningu og samþykki notendaskilmála.


Skráðir notendur taka þátt á þessum samráðsvettvangi með því að setja fram hugmyndir, skoða hugmyndir annarra, rökstyðja mál, segja skoðun sína eða gefa hugmyndum og rökum vægi með því að styðja þær eða vera á móti þeim.

Um leið og notandi setur fram hugmynd á Betri Reykjavík, er litið á hana sem sameign borgarbúa, enda getur upphafleg hugmynd tekið breytingum í því samráðsferli sem þessi vettvangur býður upp á. Reykjavíkurborg áskilur sér rétt til að nota þær hugmyndir sem fram koma á þeim samráðsvettvangi sem Betri Reykjavík er.

Við notkun á Betri Reykjavík er mikilvægt að hafa í huga að Reykjavíkurborg er stjórnvald sem starfar eftir lögum og reglum og hefur ákveðið verksvið. Í ljósi þess er ekki er sjálfgefið að unnt verði að taka allar hugmyndir til formlegar meðferðar.


Reykjavíkurborg skuldbindur sig til að taka hugmyndir af Betri Reykjavík til formlegrar meðferðar á þann hátt að mánaðarlega fara fimm efstu hugmyndirnar til vinnslu hjá viðkomandi fagráði (þær sem fá mesta vægið). Auk þess er efsta hugmyndin í hverjum málaflokki mánaðarlega tekin til umfjöllunar hjá viðkomandi fagráði (málaflokkarnir eru ferðamál, framkvæmdir, frístundir og útivist, íþróttir, mannréttindi, menning og listir, menntamál, samgöngur, skipulagsmál, stjórnsýsla, umhverfismál, velferðarmál, ýmislegt). Þetta gerist þannig að klukkan 12.00, síðasta virka dag hvers mánaðar, eru fimm efstu hugmyndirnar á Betri Reykjavík og efsta hugmyndin í hverjum málaflokki, færðar á sérstakt svæði á Betri Reykjavík. Þar með er ekki lengur hægt að gefa þeim vægi sitt. Þessar hugmyndir, með rökum og umræðu um þær, eru teknar til umfjöllunar hjá viðkomandi fagráði eins fljótt og auðið er. Stefnt skal að því að umfjöllun fari fram innan mánaðar. Sumarfrí fagráða geta þó leitt til þess að lengri tími líður áður en formleg umfjöllun fer fram. Fagráð getur sent hugmyndir til hverfaráða til umfjöllunar, ef það telur tilefni til. Aðrar hugmyndir, sem ekki eru teknar til umfjöllunar hjá Reykjavíkurborg, eru hins vegar áfram opnar til umræðu hjá notendum Betri Reykjavíkur.

Hugmyndir sem fá minna vægi er ætlað að vera ráðgefandi fyrir kjörna fulltrúa og stjórnendur borgarinnar.

Hugmynd sem fer til meðferðar í stjórnsýslu Reykjavíkurborgar er lögð fram í nafni Betri Reykjavíkur sem lýðsprottin hugmynd.


Viðkomandi fagráð fjallar um hugmyndir af Betri Reykjavík og tekur hana til afgreiðslu sem samræmist þeim heimildum sem hvert ráð hefur. Á Betri Reykjavík er gerð grein fyrir málsmeðferðinni svo og afgreiðslu fagráðs þegar hún liggur fyrir.

Hafa ber í huga að endanleg ákvörðun um framgang og afgreiðslu einstakra hugmynda af Betri Reykjavík er í höndum stjórnkerfis borgarinnar.

Gert er ráð fyrir að vefurinn Betri Reykjavík verði þróaður í þá átt að hann geti orðið vettvangur rafrænna kannana eða samráðs af ýmsu tagi, s.s. stefnumótun eða forgangsröðun fjármagns. Raunhæfur möguleiki er einnig á rafrænum kosningum um einstök mál, t.d. með rafrænum skilríkjum.

Sjálfseignarstofnunin Íbúar Samráðslýðræði rekur þennan vef fyrir og í samstarfi við Reykjavíkurborg.


Njóttu vel.